Na Wildeman Legal hopi bia nos ta preferá di regla un disputa entre partidonan. Un areglo ta nifiká ku partidonan ta purba yega na un solushon ku tur dos partido por bai di akuerdo kuné. Esaki ta nifiká ku prosedimentu hurídiko no ta nesesario. Esaki no solamente ta spar sèn pero tambe tempu. Mas importante ainda, durante prosedimentu hurídiko bo no tin kòntròl riba transkurso di e proseso, miéntras ku esaki ta mas e kaso durante un proseso di negosiashon. Ademas, prosedimentunan legal por ta emoshonalmente agotador.
Den e último lunanan, nos a yuda un kantidat di dunadó di trabou ku tabata deseá di terminá mutuamente e relashon di trabou ku un empleado. Na final di e proseso di negosiashon aki, e akuerdonan ku e partidonan a hasi pa loke ta trata e terminashon di e kontrato di trabou ta wòrdu registrá den un akuerdo di terminashon, tambe konosí komo un akuerdo di areglo. A bira bisto ku den práktika ainda tin sierto insertidumbre tokante ki ora akuerdonan tokante terminashon di e kontrato di trabou por wòrdu konsiderá obligatorio i ki ora nò. E pregunta aki ta hunga un ròl en partikular ora ku e partidonan no a yega na palabrashonnan kompleto riba e terminashon di e kontrato di trabou. P’esei nos a nota ku dunadónan di trabou ta lucha ku e pregunta den kua kasonan nan por asumí ku e kontrato di trabou ku e empleado a wòrdu terminá. Si esaki no ta e kaso, e dunadó di trabou ta kore un riesgo finansiero debí na e obligashon di sigui paga salario.
Den un kaso mas resien, nos a asistí un organisashon grandi pa logra e terminashon di e relashon di trabou. Den e asunto aki, e partidonan a yega na un acuerdo riba e hecho cu nan kier termina. Tambe a yega na un akuerdo riba e fecha di terminashon i e kompensashon di terminashon. E problema tabata ku e empleado no kier a firma e akuerdo di areglo, komo ku e empleado apsolutamente tabata ke risibí e pago di terminashon den kuota. Esaki no tabata un opshon pa e dunadó di trabou. P’esei e partidonan no por a yega na un akuerdo tokante e método di pago di e kompensashon. E pregunta tabata si e punto di diskushon tokante e pago di e kompensashon tabata sufisiente pa por papia di un terminashon di e relashon di trabou.
Loke ta importante ta ku ta kla for di e sirkunstansianan di e kaso, mas spesífikamente e deklarashonnan di e partidonan, ku a yega na un akuerdo riba e kosnan esensial di e terminashon. Esensialnan ta referí na e partinan mas importante di e akuerdo di terminashon. Esaki ta inkluí (1) e akuerdo tokante e terminashon di e kontrato di trabou komo tal, (2) e fecha di fin i (3) kualke kompensashon di terminashon. Si e punto di diskushon entre e partidonan no ta afektá e núkleo (esensia) di e disputa, por asumí ku e punto di diskushon aki no ta stroba e relashon di trabou di wòrdu terminá.
Den e kuadro aki, un dunadó di trabou mester ta konsiente ku e empleado lo aseptá (konsentimentu) solamente si e ta di akuerdo klaramente i sin ambiguidat ku e terminashon. Hopi bia ta konsiderá ku konsentimentu ta eksistí ora e empleado ta wòrdu asistí pa un abogado òf eksperto hurídiko i/òf e empleado tabatin un periodo di tempu rasonabel pa konsiderá e oferta.
Asta si e empleado na final di kuenta no a firma, por ehèmpel pasobra e no tabata di akuerdo ku e manera ku e kompensashon a wòrdu pagá, loke generalmente ta e kaso pa e kompensashon wòrdu pagá den un solo biaha, esaki no ta nifiká ku e empleado no ta mará na e otro akuerdonan hasí entre e partidonan. Al fin i al kabo, e akuerdo di areglo ta djis un formalisashon i mas elaborashon di e akuerdo ku e partidonan a yega na dje kaba.
Kada proseso di negosiashon ta diferente. Sinembargo, tin algun sosten disponibel pa dunadónan di trabou ku ta wòrdu konfrontá ku e problema aki. E prinsipio di guia ta ku e partidonan ta yega na un akuerdo riba e elementonan esensial di e disputa. Pa e motibu aki ta un bon idea pa laga un abogado asistí bo.
Si bo ta rekonosé bo mes den e historia aki pasobra bo no por yega na un akuerdo ku bo empleado, por fabor no duda pa tuma kontakto ku nos. Nos lo ta kontentu di papia tokante bo opshonnan ku bo.
Tokante e outornan
